【Now財經台】港交所(00388)將於下周一(23日)起實施「打風照炒股」安排，加上美國啟動減息周期，相隔3年再有巨無霸IPO美的集團(00300)上市，以及電商龍頭阿里巴巴(09988)獲納入港股通等因素，港交所前景係咪有望改善？
紅蟻資本投資總監李澤銘指，聯儲局大手減息0.5厘係令人意外，雖然一定會刺激港股投資氣氛，而本港多家銀行亦隨即宣布跟減，下調樓按息亦可減輕供樓人士負擔，但對帶動消費、經濟等作用唔大。
Alan認為，港股要突破阻力需要靠內地，但暫時仍未見刺激經濟等進一步政策出台，加上人民銀行今日(20日)公布貸款市場報價利率(LPR)維持不變，相信港股未來仍有調整壓力。
新股市場方面，美的上市後表現唔錯，但Alan認為，所謂3年以來最大型IPO，集資規模難以同以往嘅巨無霸新股比較。佢又話，美的上市後暫時未有另1隻更大型嘅新股IPO「接力」。
至於阿里納入港股通後北水可以買貨，Alan認為對港股只有少少幫助，更多係幫返阿里本身。整體而言，上述提及嘅「利好」因素都對港交所幫助唔大。
