【Now財經台】公開招股超額認購逾千倍，兼成為「凍資王」嘅廚具股卡羅特(02549)，昨日(2日)首掛打響頭炮，今日(3日)一度逆市升逾9%，逼近10元關口。內地家電巨頭美的集團(00300)上市後表現強勢，以昨日收市價計，股價累升約70％。至於今日截飛嘅太美醫療科技(02576)招股反應唔錯，有機會超購約58倍。港股今輪大升浪中，炒新股係咪另一個賺錢機會？新股招股期間會鎖住大量資金，擔唔擔因而錯失其他投資機會？
艾德金融執行董事陳政深指，新股獲利空間係睇供求，所以市場氣氛係非常重要，雖然今日冇咗北水，但大市成交暫時已逾2500億元，同之前日均成交1000億元都唔夠，氣氛已經完全唔同，加上近日上市嘅新股表現唔錯，所以新股係值博。
Ryan又話，一般券商會提供比較高成數嘅孖展，個別質素較好，或者所謂嘅明星新股，孖展甚至可以做到90％，一般做50%至70%都應該冇乜難度，所以被鎖住嘅資金有限，但佢提醒，抽新股時要量力而為及好好分配注碼。
