【Now財經台】統一企業中國(00220)昨日(7日)出咗業績，純利、收入、毛利率，以至食品及飲品業務收入全部都有增長，呢份成績表係咪都應該收貨？不過，統一股價今日(8日)一度重挫10%？展望下半年，統一會有咩業務策略？
耀才證券研究部總監植耀輝指，基本上所有大行對呢份業績都收貨，盈利表現亦好過大行預期，如果撇除部分一次性因素，純更多賺約50%，表現十分唔錯，依家市場較為關注集團下半年表現，不過，統一下調咗全年銷售增長指引，由年初8%至12%，下調至介乎5%至8%，公司對銷售增長指引冇信心，有機會係股價大跌嘅原因。
Stanley又指，統一對下半年銷售比較審慎，但對毛利率仍好有信心，不過，內地市場競爭激烈，靠價格突圍係其中一個方案，當同業加價統一唔加嘅時候，統一可能有機會受惠，但由於同業有一定客源，所以受惠程度可能唔會太大，如果統一想提升市佔率，就要增加宣傳及推更多新產品。
