【Now財經台】統一企業中國(00220)招牌產品老壇酸菜牛肉麵，繼2022年爆出「土坑酸菜」食安事件後，最新又喺內地社交平台瘋傳杯麵內嘅酸菜包疑似有老鼠頭，受消息拖累，統一股價今朝(16日)低開後，跌幅急速擴大，一度大跌8%，低見6.24元。
值得留意係，當年被央視揭發「土坑酸菜」事件，統一股價一度單日瀉11%，但收市倒升，反映食安問題未必會推冧股價，而統一亦好快作出回應，指會跟消費者聯繫確認核實，要留意統一股價今日可唔可以重演單日轉向。
統一今年3月出完業績後，股價走勢一直唔錯，但近期開始轉弱，今日再以大陰燭向下，技術走勢轉弱，並形成頭肩頂形態，更跌穿今年上升支持位，暫時喺6元水平有個大裂口，後市要考驗呢個支持位。
