【Now財經台】食品股統一企業中國(00220)按年少賺18%，毛利率微跌，又削派息，但股價今日仍跑贏大市，由噚日收市跌轉升逾8%，高見7.65元，升穿埋50天線。耀才證券研究部總監植耀輝預期，股價短線衝破8元難度唔大。
集團管理層重申到2026年嘅銷售目標，要達至500億元人民幣，反映年復合增長達15%。單計今年，預計銷售有雙位數升幅，同時估計毛利率可以喺今年第2季有返正增長。
滙豐證券預料，較高毛利嘅飲品業務有助推動今年銷售前景，一來受惠於內地放寬防疫措施，二來是集團提升飲品對餐廳嘅銷售。
Stanley亦睇好統一前景，指出集團目標看似進取，不過公司已經大幅節省經營成本，加上各類原材料價格、勞工及運輸成本已從去年高位慢慢回落，相信今年毛利率同經營溢利會顯著改善，帶動盈利反彈。佢又補充，近來內地通脹增長低，對公司控制生產成本未必係壞事。
