【Now財經台】日清食品(01475)股價3連跌，今朝未出業績已跟大市跌，更一度失守100天線，似乎業績完全帶動唔到股價，用日清市盈率(PE)計，其實唔會平過康師傅控股(00322)等同業，息率亦唔高。
博威環球資產管理金融首席分析師聶振邦指，日清業績唔見有好多亮點，但股價由舊年5元樓下慢慢升上嚟，所以市場普遍憧憬復常會進一步利好日清業績，日清業績今日終於出爐，由於收入令市場失望，因而出現沽壓，加上股息率差過同業，依家康師傅、統一企業中國(00220)股息率都有6厘以上，日清只得逾2厘，一定會影響對投資者嘅吸引力。
聶Sir又話，康師傅、統一產品價格都平過日清，內地經濟仍未全面復常下，康師傅、統一或可能因此而受惠。
