【Now財經台】截至早上11時止，1小時內《彭博》全球用戶關注度上升最多首5隻港股，依次為永利澳門(01128)、中國石油股分(00857)、建設銀行(00939)、長和(00001)、萬科企業(02202)。
永利澳門母公司永利度假村(WYNN RESORTS)公布上季業績，期內，澳門業務盈利增長逾10%。摩根大通指，呢份業績差過預期，但利潤率仍然健康，並指競爭未有惡化，營運及宣傳支出亦控制得宜，不過，集團亦提及非博彩收入按季跌11%，係疫後重啟以來最低水平，其中，以零售收入打擊最大。點睇呢份業績？永利股價持續弱勢，到底幾時先止跌？
資深證券分析師彭偉新指，澳門博企淨贏率一直維持2%至4%，但疫後冇咗貴賓廳(VIP)收益，單靠中場一直無法重返疫前總收益80%以上，所以要靠非博彩收入抵銷呢個缺口，不過，現時非博彩收入嘅跌幅，導致市場現時對澳門博彩業前景，已經冇疫後重啟時咁樂觀，因此，股價要重拾升勢需要一段較長時間。
