【Now財經台】截至早上11時止，1小時內《彭博》用戶關注度上升最多港股，依次為金沙中國(01928)、港交所(00388)、周大福(01929)、萬科企業(02202)、銀河娛樂(00027)。
澳門《博彩信貸法》會喺今年8月生效，日後有賭牌嘅公司先可以向賭客借出籌碼，即中介唔可以用個人名義借出，但可以繼續幫賭場拉客，賭股今日(15日)向下，其中，以金沙及銀娛跌得最甘，係咪受呢個消息拖累？「五一黃金周」將至，賭股係咪最少可以炒返轉？
富昌證券聯席董事譚朗蔚指，《博彩信貸法》的確會限制咗傳統賭枱交易，市場都擔心會影響賭收，但值得留意係，今年農曆新年旺季後，賭收都冇乜支持，賭股近期走勢亦好分化，金沙及銀娛都炒唔起，反而永利澳門(01128)及美高梅中國(02282)就有鑊氣，應該同賺返錢或可能提前派息有關，反映市場焦點唔同咗，單靠旺季或賭收未必可以撐起成個板塊，市場依家更著重企業盈利，尤其派息問題。
Stevan又話，「五一黃金周」炒作空間唔大，因為唔再出現疫後嘅爆發性增長，而龍頭金沙及銀娛亦未有翻身故事令市場做重估，再加上《博彩信貸法》消息，唔建議投資者「五一黃金周」前偷步部署。
