【專家分析】林嘉麒:唔考慮現價買騰訊

【Now財經台】市場一直憂慮騰訊控股(00700)南非大股東旗下公司Prosus嘅減持行動帶來嘅沽壓。不過，有資料顯示，騰訊首季回購股數超過Prosus同期拋售嘅股份量，相信抵銷到減持對股價嘅影響。

騰訊將於5月14日公布業績，集團似乎進入靜默期，所以呢兩日未見公布回購行動，而股價今日(17日)要跟隨大市向下，並一度跌穿300元大關。既然大股東減持陰霾已散，點解股價今日仲會受壓？

元宇證券投資總監林嘉麒認為，雖然騰訊喺之前港股大跌時，仍可領先大市，股價能夠喺高位企穩頂住大市，但短線可能會跟住其他科網股，甚至大市下跌，直言現時唔會考慮買騰訊。

KK續指，300元唔係明顯支持位，之前股價一跌穿300元跌勢就加快，加上稍後美國科企公布嘅業績一旦未必理想，可能會拖累埋港股科技股。佢又提到，自上周三(10日)起，騰訊嘅沽空比率由約10%，急升至現時逾20%，反映唔少資金部署騰訊股價之後會下跌。