我的股票

    名稱 現價 升跌

    資料報價延遲十五分鐘

    盤房來料丨港股重磅股業績後插水 阿里績後表現受關注

    【分析】 信報財經新聞 37分鐘前

    【信報財經新聞】聯儲局陸續有人出嚟放鷹,理事Christopher Waller建議當局應考慮12月大手加息半厘;沃爺於CNBC訪問中表示,美國通脹仍然走緊唔啱嘅方向,簡單講通脹仲升緊,因此加息行動應更為進取,提到過去3個月通脹均接近3.5%,遠超過當局理想嘅2%目標。聯儲局放鷹,拖累美股反彈受阻;道指周二大冧848點後,周三續低開132點,跌幅一度擴大至最多730點,低見50029;收市道指仍要下跌561點或1.11%,報50198;標指跌16點或0.23%,報7323,已連跌5個交易日;納指升101點或0.42%,報24429。

    人工智能(AI)基建相關股份個別發展,Nvidia唱好其前景,NVDA股價一度彈升2.7%,收市倒跌2.9%,董事會已講到明,暫時無意畀黃仁勳回巢,公司管理層變動仍然不明朗,股價出現折讓亦無可厚非。阿Man近日幾乎無乜短炒,前日接咗680嘅MU,數量有限,無打算炒出炒入住。至於NVDA減咗部份162,排返入152,又真係中返152,盤後曾略穿150,呢10蚊短炒操作望減輕持貨成本,預咗NVDA都要有耐性。市場關注AI巨頭Anthropic嘅IPO定價及周四掛牌後股價表現,今晚開市自有分曉。META、AMZN及GOOG繼續持貨,MSFT排個490一直買唔到,反正有平貨底,就唔急加注。呢期少咗炒正股,反而NQ日日超過500點波幅,有時單日高低更達1000點,NQ成為阿Man近日嘅遊樂場。今晚NQ分水嶺繼續27400,支持27300/27200/27100/27000,穿27000就退守至26600-26800,阻力27500/27600/27700,企到27700先再睇上面。

    美元走強,美債息仍然高企,金價回落早已再失4000美元,目前連3800關亦失守,隔晚貴金屬及工業金屬股全線受壓,資源股亦被遭洗倉。美國最大銅礦商Freeport-McMoRan股價插水近7%,必和必拓(BHP)ADR挫4.8%,雪佛龍亦跌4%。UnitedHealth急跌10.2%,為跌幅最大道指成份股;迪士尼反彈4.6%,為表現最強道指成份股。美國10年期債息先升後曾挫5.4個基點,至5.05厘;對息口較敏感嘅2年期債息一度漲3個基點,至4.834厘。聯儲局放鷹,繼續支持美元滙價向上,美滙指數最多上揚0.41%,至103.911;歐元下滑0.41%,至1.0953美元;日圓曾跌0.17%,至159.65兌每美元。加密貨幣「一哥」比特幣曾降0.72%,至63825美元。

    港股昨日低開79點後持續走弱,盤中一度跌300點至23208低位,全日跌213點,報收23294,成交額縮減至1771億元,北水錄得淨流入27.51億元。大型科技股續後受壓,繼百度(09888)業績後急挫,京東(09618)業績後亦顯著受壓。收市後騰訊(00700)公布業績亦強差人意,股價ADR較昨日本港收市價回落3%,拖累夜期跌逾百點,一度逼近23000大關。今早黑期走軟,於23100水平徘徊。恒指低開245點,報23049點,開市係半場高位,23000迅速失守跌幅最多擴大至492點,低見22802,早市尾段跌勢稍為回順。恒指半日收報22855點,跌439點或1.89%。大市半日成交1233.84億元,北水淨流入44.08億元。北水連續第三日淨流入,加上技術走勢已見超賣,又去返10月低位,若然午後再略為打穿22800及22700,再回收至少897張期指嘅牛證,甚至多823張期指嘅牛證,由24800落嚟二千點,都足夠大戶食飽,大市亦可以抖抖氣,做返個短線反彈,不過都要睇埋收市後阿里巴巴(09988)業績後股價表現。

    今早騰訊插水6%,350-355回收嘅牛證全軍覆沒。今日收市輪到阿里巴巴業績,上季公司已出現負現金流,預計Q3都係咁上下。自阿里巴巴宣布分拆平頭哥之後,股價不升反跌,唔少人不明所以,但阿Man就好明白,為乜分拆平頭哥,巴巴反而跌到一仆一碌。阿里呢幾年辛辛苦苦養大個平頭哥,股東諗住苦盡甘來,誰知巴巴一句分拆,平頭哥IPO上市,原有股東當然唔會有實物分配,亦唔會有平頭哥H股保證配股,咁即係原有股東,要額外再拎錢出嚟買平頭哥,咁當然平頭哥仍然係阿里子公司,咁平頭哥嘅價值亦會反映喺阿里嘅估值上,只係呢一刻,唔排除有個別股東,只係睇重平頭哥,而唔睇好阿里整體業務表現嘅,會先沽出阿里,套現買平頭哥,呢個亦係阿里公布分拆後,股價插水原因。

    美國中期選舉過後,民主黨掌控參眾兩院,市場預期政策或出現傾斜,同時多位聯儲局官員相繼放鷹,市場憂慮12月加息幅度擴大,明年加息次數或增加。目前恒指再度失守所有移動平均線,加上重磅股業績公布後,股價相繼受壓,搞到港股不僅打回原形,更再一次跌至10月低位。短線大市反彈阻力為23300-23400,下一阻力為23600-23700。而11月12日所遺下的下跌裂口24132-24268已超過5個交易日未有回補,此下跌裂口同時亦處於而11月5日上升裂口23919-24281之內,以裂口補裂口令日線形成一個孤島形態,料23900-24300此水平阻力甚大。如一直未能回補下跌裂口,甚至連巨型上升裂口底部即23900亦未能重返,則後市持續走弱。今日已打穿23000,暫時喺22800即10月低位,亦為周線保力加通道底部爭持。較大支為今年低位22500水平,同時亦為日線保力加通道底部。此兩關一旦跌破,或要往月線保力加底部,即22100-22200水平尋找支持。

    麥狄文

    (徐狄怡‧證監會持牌人)

    想睇更多財經消息
    即