【Now財經台】嘉里建設(00683)以逾43億元奪得何文田佛光街豪宅地，較估值上限高約40%，呎價近2.1萬元，市場估計，落成後呎價要3.9萬元至4萬元先可以收支平衡，附近新鴻基地產(00016)旗下豪宅天鑄，最新二手成交呎價約3萬元，發展商今次用高價投得地皮，係咪反映對呢個項目及樓市前景有信心？
高歌證券金融首席分析師聶振邦表示，依家呢幅地皮定位傾向豪宅類，但都要視乎落成時本港經濟狀況，如果同依家差唔多，呎價可以去到3.9萬至4萬元，但都要睇埋有冇其他配套，例如智能配套等，因為可以提升吸引力。
聶Sir又話，市場上對項目每呎造價睇法分歧，較進取就睇3.3萬元，但如果同預期呎價3.9萬元比較，就冇乜水位，亦有分析估計造價約2.6萬元，呢個同預期呎價比較就有較大水位，但佢認為，造價喺3萬元以下比較合理，暫時睇嚟，嘉里仍有利可圖，但實際賺幅就有待觀察。
