【Now財經台】截至早上11時止，過去1小時內《彭博》搜尋量最多港股，依次為金斯瑞生物科技(01548)、濰柴動力(02338)、晶泰控股(02228)、英矽智能(03696)、藥明生物(02269)。
生物科技股今日(7日)大跌，係咪受之前莫德納(Moderna)被大行下調評級影響？投資者係咪可以趁北水「回歸」前撈下貨？
資深證券分析師彭偉新表示，Moderna被調低評級應該唔會對生科股造成咁大殺傷力，反而係投資者集體食糊，可能令股價大跌。佢又話，北水唔可以喺高位沽貨，有可能會喺關鍵支持位買返轉頭，若投資者喺呢個時候撈呢啲股份，再等北水「回歸」推高股價，然後食糊贏面會較大。
Castor又認為，生科股及具人工智能(AI)概念藥股整體上升空間唔止咁少，行業依家先啱啱起步，未來藥物開發及生產會提升盈利能力，加上有長遠嘅藥物收入現金流，建議投資者不妨將上望空間睇高啲，買入價就唔好高過北水放假前水平，咁先會有退守空間。
