【Now財經台】吉利汽車(00175)股價今日(29日)一度急挫逾8%，低見14.8元，跌至1個月低位，吉利母企同蔚來(09866)日前就換電及充電業務達成戰略協議，消息公布後，吉利股價升逾3%，但今日就大跌，係咪市場發現呢單消息有問題？
Blue Water Capital投資總監李澤銘認為，吉利母企同蔚來(09866)合作市場似乎唔Buy，蔚來係內地第一家提供換電服務嘅車企，集團投放咗好多資金喺換電業務，不過，蔚來多年來都係內地新能源車企中，累計蝕得最甘嘅車企，累計虧損過千億。佢又指，依家嘅新能源車充電時間愈來愈短，電量愈來愈大，令換電嘅必要性逐步降低，一旦日後固態電池研發成功及商用化後，換電業務就會變成「鷄肋」。
Alan又指，吉利本身都有做少少換電業務，佔營收或資產比例極低，吉利母企同蔚來合作，令市場擔心吉利未來會搞電池業務，所以市場唔睇好。
