【Now財經台】阿里巴巴(09988)續受制10天線，更成為今朝(17日)拖低大市嘅股份之一，阿里今早低開後，一度跌逾1%，低見104.2元，如果想博反彈，保守啲嘅CALL輪會唔會比高槓桿牛證更合適？
花旗上市衍生產品部副總裁麥穎儀指，一般嚟講，如果市況向好，投資者會傾向追高槓桿、年期較短嘅產品博爆發力，但近期相對保守嘅資金，主要部署大藍籌，表現相對弱勢嘅阿里，資金就偏向揀長身啲，避開時間值損耗，同埋相對貼價嘅產品。
Jenny補充，明年2月初到期，行使價約128.8至129元，價外約20%，呢類CALL長身啲，價外幅度適中，槓桿都做到6.6倍，輪價可做到0.1元樓下，對冲值比到30%，跳價亦相對敏感，呢類條款會較受投資者歡迎。
