【Now財經台】金斯瑞生物科技(01548)計劃將蓬勃生物(Probio Technology Limited)分拆喺聯交所主板獨立上市，股價今日(4日)顯著受壓，一度急瀉近14%，低見31.26元。早前，集團指可以用人工智能(AI)加快藥物研發，刺激股價走強，不過，分拆消息一出，即時震散股價，點睇價出現呢個情況？
高歌證券金融首席分析師聶振邦指，金斯瑞股價今日急挫明顯同分拆消息有關，當出現未必係傳統利好消息時，可以令股價進一步爆升，而以往股價弱勢時，任何利好消息都可以稍為提振股價。
聶Sir又話，金斯瑞今輪升浪由不足11元起步，升到現水平，一啲潛在利好因素都反映咗喺股價上。此外，而分拆後業務結構會唔會有變，都係沽貨誘因，亦係今日大跌嘅主因。佢又提醒，未來一兩個交易日要繼續留意金斯瑞走勢，如果消息面持續發酵，有可能跌穿30元，到時先可以確立今輪升浪結束。
