【Now財經台】金斯瑞生物科技(01548)今日(17日)公布同禮來公司(Eli Lilly and Company)達成合作，消息刺激股價破頂，收市報36.78元，飆近13%，市場依家熱炒公司AI製藥(AIDD)驗證業務，點睇公司未來發展？
獨立股評人植耀輝指，金斯瑞AIDD業務增速好快，發展空間亮麗，雖然本地相關概念股唔係特別多，但其實AI醫療概念喺美股已經炒咗1至2季，相信股價可以受惠於愈來愈多公司參與，以及市場認知度提升，金斯瑞上次配股後，股價表現硬淨，雖然業務仍處投資階段，規模亦有待擴大，但相信集資後，投資者會憧憬其未來發展更有保證。
Stanley又話，市場預期，AIDD喺2026至2035年間，複合年增長率可達24.8%至33%，喺醫療科技中發展算快，未來呢個範疇對集團嘅貢獻只會持續擴大。
估值方面，按業務嘅藥物驗證工作而言，金斯瑞同傳統藥明系較為接近，但依家藥物驗證規模或比以前大好多，加上算係新概念，兩者身處嘅位置都有啲分別，所以未必可以同舊有概念作比較。
