【Now財經台】截至早上11時止，過去1小時內《彭博》用戶搜尋量最多港股，依次為金斯瑞生物科技(01548)、濰柴動力(02338)、新世界發展(00017)、智譜(02513)及紫金礦業(02899)。
金斯瑞股價今早(17日)高開逾2%後，升幅一度擴大至逾17%，高見38.28元，主要受惠與國際藥企禮來公司(Eli Lilly and Company)嘅人工智能(AI)/機器學習藥物發現協作平台Lily TuneLab達成合作，為對方提供濕實驗服務，將AI預測轉化為生物驗證數據，金斯瑞股價今日大升，係咪反映配股消息已消化晒？
資深分析師曾永堅指，醫藥板塊，尤其係醫藥外包(CRO)方面，本身喺國內具備自主研發及創新能力強嘅藥廠，如果可以同外國藥廠加強合作，以及獲得技術加持，相信醫藥板塊估值會進一步提升。佢又話，現時市場仍有「AI+」主題，若能跟外國AI巨頭或大型語言模型(LLM)大數據公司強強聯手，相信會引發新一輪資金追捧潮，Jaseper認為，最少短期內，「AI+」尤其CRO板塊會係較當炒嘅題材。
佢又指，金斯瑞股價近期氣勢如虹，後市有機會挑戰2021年歷史高位，即42.5元水平。
