【Now財經台】截至早上11時止，過去1小時內《彭博》用戶搜尋量最多港股，依次為比亞迪股份(01211)、中國銀行(03988)、美團(03690)、建設銀行(00939)及舜宇光學科技(02382)。
美團上季業績扭虧為盈，上季轉賺逾21億人仔，經調整亦賺逾25億人仔，遠好過預期，期內，收入按年增長逾14%。近日各大行都有提及美團嘅外賣業務，指經營情況明顯改善，而外賣「UE」(即平均每張單賺蝕幾多)亦轉正。不過，由於美團未來要大規模擴展新業務，銷售及營運開支一定會增加，點睇美團嚟緊嘅發展？
富昌證券聯席董事譚朗蔚指，美團股價今日(31日)可以逆市升，係因為單次盈利跑贏咗好多大行嘅預期，但係咪可以持續上升仍然係一個疑問，始終要喺唔同市場搶市佔率、拓展業務都有「燒錢」風險，所以應該審慎啲。
Stevan續指，美團同人工智能(AI)冇咩闗係，所以唔使燒錢搞AI，呢方面會令市場較放心。股價方面，佢估計，就算繼續反彈，升至介乎82元至86元都差唔到行人止步。
