【信報財經新聞】中東局勢持續緊張，加上美國30年長債息再次回升，美股周四受壓。道指低開81點後，跌幅擴大至最多708點，最低報52754，收市道指報52759，跌703點或1.32%，以接近全日低位收市；標指跌66點或0.87%，報7641；納指跌263點或1%，報26067。美國總統特朗普有意轉打經濟戰，向伊朗施加經濟壓力，紐約期油連升5日，曾漲3.69%，高見每桶89美元，收報87.83美元，仍升2.33%。美國10年期債息曾升6.54個基點，至4.712厘，30年期債息上揚7.45個基點，至5.2656厘，對息口較敏感嘅2年期債息漲3.78個基點，至4.2002厘。
百達財富管理(Pictet)股市策略主管Graham Secker認為，倘若債息上升存在結構性原因，短期干預行動只能爭取一些時間，未必能改變長期走勢。三藩市聯儲銀行總裁Mary Daly於彭博電視訪問中稱，債息上漲並唔反映政策訊號，認為聯儲局政策目前處於良好位置，未有證據驅使當局要提早加息。美滙指數曾跌0.28%至98.557，續創3個月低位，其後回穩；日圓回落0.65%，至159.19兌每美元。
重磅股中，特斯拉(Tesla)股價收市挫1.7%；SpaceX跌4.1%，報134美元，再次失守IPO招股價135美元，約3.19億股早期員工及投資者持有股票解禁；亞馬遜亦跌2.2%。沃爾瑪上季美國同店銷售表現遜色，股價急跌9.2%，為2022年7月單日跌得最甘，亦係單日表現最差道指成份股。雖然三大指數都插水，但阿Man個短炒倉表現唔差，MU喺920中咗一注嘅貨，決定推止賺上960，穿返50MA就食咗先，或者係炒住880至980呢個range先。DELL喺428買返嘅貨，未止蝕就keep住先。MRVL企返250，走勢唔錯。
ALAB兩注貨亦坐定定，繼續用278做個防守位。不過噚晚科技七雄全部腳軟，但NVDA仍然企喺210上面，繼續持有。INTC一度假穿90，但收市又企返90樓上。NBIS等緊運到，同樣未hit止蝕盤就再坐一會。NQ暫時29200似乎守得到，但29800企唔返就弱咗少少；今晚NQ分水嶺喺29300，支持29200，穿29200就會再差少少，下一個支持喺29000，最大個支持係28700-28800；反彈阻力29400/29500/29600，企唔返上去29600就落咗一級，個range下移至28700至29600。
港股連續第四日上升，恒生指數高開284點，最多升347點，見25842高位，收市升幅收窄至203點，報收25698，成交額2691億元。收市後阿里巴巴(09988)公布業績，加上美股下跌，拖累夜期一度跌至25550水平，不過10日線及20日線仍守，最終收市重返25700水平附近，今早黑期亦於25700水平徘徊。雖然阿里巴巴公布業績後，ADR股價曾下跌，但最終收復失地，似乎市場對其AI業務未來發展仍有信心，公司又一次重新整合各項業務，管理層更表示按照目前投資回報周期計算，料可於三年內回本，向投資者大派定心丸。以為阿里巴巴可以擺脫重磅科技股業績後股價見光死命運，可惜一開又向下，暫時落到20MA前面見支持，若然今日收市跌穿121走勢會轉差。
內險股平保(02318)績後股價升逾3%，整個內險板塊都上升，帶動指數造好。港股恒指高開109點，報25807，已為半日低位，其後最多升213點，高見25911，半日高低波幅只有103點。恒指半日升184點或0.72%，報25883，企返上條250日線上面。大市半日成交1359.73億元，北水淨流出16.92億元，北水幾日錄得淨流出，似乎喺26000大關前都較為保守。
雖然指數已重返多條移動平均線之上，但阿Man都多次強調，由25000樓上開始，一直未見價量齊升，成交方面一直未能配合，暫時26000大關阻力仍大，唔係咁容易一舉突破向上。至於下方25000水平有不俗支持，港股或待下周四大內銀及美團(03690)公布業績後，方有較明顯方向。加上下周五期指結算，下周將踏入期指轉倉高峰期，而恒指高企，暫時高位整固。港股相對其他市場估值仍偏低，下行風險較細，有一定安全邊際，如其後成交能增加配合，港股仍有一定修復估值能力。反而留意美債息仍然高企，會否打擊環球股市表現，影響整體投資氣氛。
