【大摩手起刀落】目標劈到550蚊 冇咗1張「紅底」騰訊3日瀉8%

【Now財經台】騰訊控股(00700)上季資本開支激增逾1.7倍，加上人智能(AI)繼續燒錢，拖累自由現金流轉為負數，出完業績後，最少3家大行「做嘢」，劈目標價、上調全年資本開支預測、削盈利預測，其中，「劈價」以摩根士丹利劈得最狠，大削15%或100蚊，由650蚊劈到550元，冇咗1張「紅底」。

業績前已經跌唔停嘅騰訊，喺大行手起刀落下，股價繼續插水，午後跌幅繼續擴大，愈跌愈多，一度低見441元，重挫4.4%，暫時已連跌3日，累跌約8%，股價最新繼續喺低位上落，暫時成交逾220億元。