【Now財經台】多家公司今日(6日)中午派咗成績表，放榜後股價普遍都要跌，唯獨九龍倉置業(01997)股價拗腰大升，一度抽升近32%。睇返太古(00019)業績，地產、飲料、航空基本溢利都有增長，當中以地產業務最突出，物業銷售收入大躍進，主要係靠出售深水灣道兩幢豪宅呢啲非核心資產，不過，寫字樓、零售物業租金收入唔算有好大改善，點評價呢份業績？
艾德金融執行董事陳政深認為，太古係綜合企業，市場唔敢畀太進取嘅估值，相比之下，九置業務較簡單，就較易估值，喺較差嘅基礎下，出現大反彈，股價自然造得好。其實太古股價今日下晝都有改善，收復上晝所有失地之餘，仲可以輕微倒升。
Ryan又話，太古基本溢利按年增長43%，經常性基本溢利都按年增長逾47%，反映持續性業務增長勁，物業估值止跌回升，帶動中期業績扭虧為盈，令盤數好睇啲，中期息都有加碼，質同量都有所上升，整體業績都偏向正面。
