【Now財經台】國泰航空(00293)今日(22日)中午發盈喜，預告中期最多賺65億元，按年大升76%，雖然呢條數係計及期內一筆一次性持有中國國航(00753)權益嘅帳面收益14億元，但扣咗呢筆錢，上半年盈利仍最多51億元，今次呢個盈喜係咪好過預期？
《香港股票財技密碼》作者梁杰文指，呢份成績表絕對好過預期，因為之前市場估計全年埋單計，國泰利潤將介乎80億至90億元，甚至擔心上半年業績會差啲，因為中東局勢令油價高企咗一段時間，始終油價佔航企成本一個較大比重，擔心上半年業績會畀油價拖累，不過，今次呢個盈喜為市場帶嚟驚喜，冇受油價影響之餘仲賺多咗。
Mike又話，基於中東局勢問題，本來經中東嘅客貨運都嚟香港轉機，印證到國泰嘅品牌、網絡優勢，同埋香港本身嘅國際航空樞紐位置。佢又認為，國泰貨運增長理想，帶動埋上半年業績，可謂有危有機，中東局勢反而利好國泰。
