【Now財經台】截至早上11時止，1小時內《彭博》用戶關注度上升最多港股，依次為泡泡瑪特(09992)、小米集團(01810)、長和(00001)、XL二南方海力士(07709)、快手(01024)。
世界盃熱潮席捲全球，早前，泡泡瑪特食住個勢推出「MEGA LABUBU 1000%世界盃」，已經喺上周五(10日)預售，雖然每隻索價約7000元，但已被搶購一空，「MEGA LABUBU 400%世界盃」將會喺明早(17日)10點開放預售，食住世界盃熱潮推一浸Crossover產品，對股價有幾大作用？
光大證券國際證券策略師伍禮賢指，新產品對泡泡瑪特股價有正面作用，加上世界盃已進入戲肉，市場對相關產品關注度亦有所提升。不過，始終要睇對泡泡瑪特長期業績、業務貢獻，唔係睇短期、概念系列產品，需要有長期或對買家有持續吸引力嘅系列，世界盃系列只係一個短周期效應，僅對短期銷售有幫助。
Kenny續指，近期泡泡瑪特股價已自低位回升，係一個有力度嘅反彈，佢認為，好大程度係因為市場憧憬8月出爐嘅業績，若今季出現較穩定嘅增長動力，股價表現有望持續改善，依家係一個築底回升格局，所以毋須重點做短線炒作，反而更應關注中線表現。
