【Now財經台】建滔積層板(01888)近日獲花旗上調目標價至100元，股價今日(16日)一度大升逾9%，高見88元，花旗指，了解到電子玻璃纖維布供應短缺，售價有望持續上升，有助建滔盈利增長，現價反映咗呢個因素未？
元宇證券大中華區股票投資總監趙晞文指，呢波炒作啱啱開始，成個人工智能(AI)供應鏈係逐步向上游炒，下游嘅AI需求漸漸拉動印刷電路板(PCB)、覆銅面板(CCL)，到依家燒到去玻纖布，由於過去幾年消費電子不溫不火，上游無擴產，當下游需求爆發，就自然陷入供不應求狀況，而行業採用「成本加成」商業模式，公司提價空間相對較高。
佢又話，利好未反映喺財務數據上，預計整體供求關係喺2027年至2028年仍偏緊，玻纖布嘅盈利能力亦會提升，加上建滔正逐步切入高端產品，由去年下半年至今，估值慢慢重估緊，市場預期，未來3年盈利增長逾40%，對應2027年估值合理，100元目標價指日可待，不過，個別技術指標顯示短期動力減弱，或有回調壓力，但基本面扎實，調整完再挑戰上市新高都唔係難事。
