【Now財經台】半新股解禁潮殺到，當中包括去年12月30日上市嘅迅策科技(03319)，IPO基石投資者涉及嘅約640萬股，將會喺月底「解禁」，股價今日收市升2.5%，收報151.1元，同上市價48元比較，累升逾2倍，似乎對基投嚟講都有沽貨誘因？
高歌證券金融首席分析師聶振邦指，迅策股價依家喺150元水平，相對於高位382.8元，已回調咗超過一半，基投嘅股份會搶閘喺6月29日解禁，而上市前投資者及大股東禁售期係1年，所以要到12月先可以沽貨。
佢又指，對基投嚟講，股價升至現水平，已經有唔少利潤，加上迅策冇盈利基礎，預期基投解禁後沽壓會比較明顯，關鍵位可以睇100元，如果沽壓冇咁大，止蝕位可以擺130元。
聶Sir又提醒，今年以來，市場焦點都落喺人工智能(AI)及半導體股，尤其係AI股，雖然冇盈利基礎，但市場暫時仍睇好AI，而AI孖寶智譜(02513)及MiniMax(00100)都會排隊解禁，一旦市場看法開始逆轉，可能會影響股價表現，其中，智譜因為發布新大模型，股價今日勁升逾30%，若股價喺解禁前升勢持續，要小心會成為之後沽貨誘因之一。
