【Now財經台】截至早上11時止，過去1小時內《彭博》搜尋量最多港股，依次為周大福(01929)、洛陽鉬業(03993)、美團(03690)、紫金礦業(02899)及MiniMax(稀宇科技)(00100)。
周大福昨日(11日)交咗一份好靚嘅全年成績表，純利按年增長52%至90億元，創新高。此外，集團亦公布咗4月、5月銷售數據，港澳同店銷售大升40%，末期息又大增40%，周大福股價今日(12日)一度飆逾18%，高見13.18元，點睇集團前景？
大華繼顯執行董事梁偉源指，周大福整體業績勝市場預期，今年4月、5月嘅營運數據反映市場對金飾產品需求頗大，金價自3月底至今累跌約10%，所以見到唔少累積嘅需求趁金價回落時湧現，帶動銷售數字造好。
Steven補充，新財年關鍵在於全年金價走勢，金價喺去年下半財年起持續急升，若金價今年穩定喺現水平，即每盎司約4200美元，將對周大福業務更有利，因為一方面對消費者嚟講，金飾價格相對吸引，另一方面對集團嘅對沖業務都有幫助，或帶嚟輕微利潤，對集團而言屬正面發展，加上近期市場擔心美國聯儲局有加息風險，如果真係加息，金價都唔會大升。
