【Now財經台】截至早上11時止，過去1小時內《彭博》搜尋量最多港股，依次為友邦保險(01299)、港交所(00388)、中國海洋石油(00883)、新奧能源(02688)及百濟神州(06160)。
友邦股價今日(11日)逆市向上，高開逾1%後，升幅一度擴大至3%，高見72.4元，集團獲摩根士丹利唱好，預期股價未來30日最多70%機會升，又認為市場過度憂慮內地收緊境外投資對友邦內地訪客保險業務嘅影響，導致股價調整幅度比大市更多，點睇友邦前景？
香港股票分析師協會副主席曾永堅指，自內地境外投資政策出台後，友邦股價已跌咗唔少，更一度跌至70元水平，今日獲「摩笛」加持，出現技術反彈都好正常，但要留意機構投資者或陸續下調友邦內涵值比率，內涵值主要反映新業務價值，對友邦嚟講，就係內地訪港旅客業務，市場除咗關注內地監管海外投資嘅政策，亦會留意退保率會唔會升。
Jaseper續指，雖然中央最近澄清，政策主要針對利用法律漏洞進行海外投資，但市場仍擔心政策會擴至保險領域，而新業務前景不明朗會困擾住市場，因此，從技術層面睇，友邦會唔會跌穿67元係一大關鍵。
