【Now財經台】截至早上11時止，過去1小時內《彭博》用戶搜尋量最多港股，依次為中國平安(02318)、華虹半導體(01347)、比亞迪股份(01211)、萬洲國際(00288)及華潤置地(01109)。
平保昨日(28日)派咗第1季成績表，賺逾250億人仔，但收入按年跌7%，期內，新業務價值升逾20%，壽險及健康險業務股東應佔營運利潤按年增長4%，有大行估計，呢個增長勢頭未來一至兩季都可以延續，到底呢份業績有冇驚喜？
資深證券分析師彭偉新表示，平保呢份成績表絕對有驚喜，新業務價值增長比預期強好多，主要係整體人民幣存款息率太低，喺回報唔太理想下，投資者未必會再將大量資金存入銀行，而轉投同存款相關嘅保險計劃，受惠於「存款搬家」概念，帶挈平保整體新業務價值增長遠超市場預期。
佢續指，雖然股市表現唔好會影響平保整體投資收益，但都只係周期性，因為A股唔係下行緊，投資者預期會慢慢追返上嚟，加上現時嘅新業務價值增長，以及車險和財險相關部分上升，市場對平保全年表現睇得好正面，所以股價先會有咁大上升空間。
