【Now財經台】萬洲國際(00288)昨日(28日)收市後出咗業績，收入按年增長6%，純利就按年增長8%，兩者都有中高單位數增長，不過，萬洲股價今日(29日)顯著受壓，一度大跌近8%，低見9.73元，點睇呢份業績？
信達國際研究部助理經理陳樂怡指，對萬洲嚟講，北美係一個幾大嘅市場，面對高基數挑戰，今次業績都算係價量齊升，經營質素及韌性都比較強，喺全球化布局下，即使豬價出現波動，喺唔同地區都有正負嘅Net-Net效應，整體而言，大致符合指引，業績係對辦，集團正處於一個穩健增長格局。
股價方面，Tracy就話，萬洲業績後受壓，主要係市場之前已對業績有憧憬，所以放榜後就出貨，喺消費品板塊中，萬洲盈利能見度有所提升，又增加派息，股息率超過9厘，投資者可以兼顧到收息及股價增值，股價今日大幅調整，可以等股價喘定後，考慮做長線部署。
