【Now財經台】ASMPT(00522)今日(22日)開市前出咗季績，上季按年多賺逾2倍，又預期今季銷售收入升37%，股價一度勁升8%，高見161元，其後升幅收窄，放榜後股價大升，係咪反映呢份季績無可挑剔？點睇公司前景？
方德證券高級分析師莫灝楠指，正常睇Book To Bill Ratio超過1已經好好，代表定單多到出唔切貨，而ASMPT嘅BTB Ratio有1.43，反映公司產品需求大。Casper又指，ASMPT屬於下游晶片設備公司，主要技術係將晶片封裝，晶片連接PCB板等，受惠於外圍人工智能(AI)股升勢強勁，各大晶片封裝廠大手加單，令ASMPT股價今日升得咁靚。
Casper續指，ASMPT首季有1名先進邏輯客戶，訂咗4台設備定單，雖然因為簽咗保密協議，唔可以透露客戶訊息，但呢張大單成功推高公司毛利率，以往呢啲封裝設備產能低，上游公司亦冇增加晶片設備嘅動力，所以交付周期短，出貨量低，依家記憶體需求好大，相信呢個情況會持續一段時間，所以市場都十分睇好ASMPT未來收入。
