【Now財經台】ASMPT(00522)股價連升11個交易日，再創新高，集團首季新定單按季大增46%，遠超市場預期。此外，綜合光學與無線連接設備供應商劍橋科技(06166)，下周二(28日)就係基投半年禁售期屆滿嘅大日子，點睇呢兩隻股份前景？
勝利證券首席顧問陳建良表示，ASMPT之前係市場低配股份，相比美股半導體指數，ASMPT估值仍有一定折讓。佢續指，ASMPT股價連日急升，既然可以每日被大幅夾高，回調嘅時候亦可以好誇張，加上已歷經咁長升浪，有意入市嘅資金大部分都做咗部署，雖然當股價回調時會有人撈貨，不過，若出現深度回調時就會觸發止蝕，所以唔建議高追呢類股份。
劍橋科技方面，KL就話，基投主要分兩大類，首先係產業投資者，其次係財務投資者，後者或會轉投其他新股，因為現時新股IPO動輒都超購幾千倍，加上新股上市頭半年好視乎供求，直至禁售期屆滿後，若有部分基石投資者減持換馬至其他新股，投資者要留意相關風險。
