【Now財經台】截至早上11時止，1小時內《彭博》搜尋量最多港股，依次為零跑汽車(09863)、智譜(02513)、舜宇光學(02382)、騰訊控股(00700)及中國石油股份(00857)。
零跑推出新車高端旗艦SUV零跑D19，售價由近22萬至近27萬人仔，係集團首款售價超過20萬人仔嘅車型，行政總裁指，D19係滿足全家出行需要嘅大車，更揚言要做「爆款」，睇返其他車企旗艦SUV定價都要40萬人仔以上，相比之下，D19定價有競爭力。不過，零跑股價今日(20日)要跌，一度大跌逾10%，低見51.05元，到底市場認為定價有問題，還是係純粹借好消息趁高出貨？
富昌證券聯席董事譚朗蔚認為，定價方面，市場都預咗如果定價太低，就會進入「內捲」漩渦，依家零跑用高檔車嚟打中價車，就會令其他競爭對手覺得零跑想鬥平，至於毛利Keep唔Keep到，呢方面可能令市場有更多考慮。
佢又話，汽股嚟講，吉利汽車(00175)及比亞迪股份(01211)係少數轉強嘅股份，至於零跑只要繼續企穩喺52元樓上，可以繼續睇好，有貨可以繼續持有，冇貨就等股價落返52元水平再做部署。
