【Now財經台】美伊喺巴基斯坦傾咗21個鐘後，最終傾唔掂數，美軍將會喺美國東岸時間今日(13日)上午10點起，封鎖霍爾木茲海峽(Strait of Hormuz)，美國總統特朗普(Donald Trump)仲話唔在乎伊朗會唔會再埋枱傾。消息拖累亞太股市今日受壓，不過，本港新股市場冇受戰火影響，繼續旺場，據德勤(Deloitte)數據顯示，本港上季IPO集資額及新股數目，大幅拋離納斯達克及紐交所成為全球NO.1，咩原因令本港IPO持續旺場？地緣局勢有冇帶嚟負面影響？
德勤中國華南區主管合伙人歐振興指，本港IPO市場主要受3大因素推動，首先係產業轉型，投資者對人工智能(AI)、晶片及生物科技等相關產業有好大憧憬，尤其內地DeepSeek性價比好高，而內地亦有足夠數據及電力推動AI發展，其次係國策紅利，內地不斷推動內需，第1季全球10大新股中，有2隻都係內需為主，例如牧原股份(02714)及東鵬飲料(09980)，都係國策受惠股，最後係資金流向，早前，市場預期美國聯儲局今年會再減息，吸引資金流向高增長嘅亞洲市場，加上港交所(00388)有唔同政策推動投資，例如簡化IPO申請程序等。
雖然中東戰事增加市場不確定性，令投資者變得更挑剔及審慎，但Edward認為，呢個波動有機會促使資金重新部署，從短期避險轉向長期喺亞洲，例如香港，做一個結構性嘅多元化布局，或會對香港有利。
