【Now財經台】美國總統特朗普(Donald Trump)最新指，伊朗希望就停火達成協議，其後有以色列傳媒報道，美國正尋求停火1個月，並列出10幾項條件，但美股3大指數昨晚(24日)都要低收。美國科技股方面，軟件股昨晚又冧過，原因係市傳亞馬遜(Amazon)旗下雲計算部門AWS，正開發一種人工智能代理(AI Agent)，目的係取代部分部門嘅職能，消息一出即震散軟件股。美國科技股喺開戰前已經跑輸傳統股，依家應唔應該入手呢類股份？
泓瀚資本董事盧志威認為，其實每次市場有全新AI功能推出，就會成為投資者沽軟件股嘅誘因，由於AI會重塑生產成本及運作流程，過程中必定涉及裁員，並透過AI功能簡化後台降本生利，即使企業將流程改為自動化，重塑過程複雜，但企業仍會照做，務求令成本降到最低。
另一方面，過往唔少軟件公司都係靠企業定單搵食，當被AI進一步取代時，市場認為呢個情況會不利軟作公司，所以就會沽貨離場。
其他科技股方面，佢直言唔太睇好微軟(Mircosoft)前景，市場需要考慮及反思未來仲需唔需要App及作業系統，同埋AI係咪已經成作業系統等，呢啲都會影響公司未來發展，不過，現時未去到咁極端嘅情況，所以Mircosoft股價短期唔使睇得太悲觀。
港股方面，William認為，雖然AI轉型仍處於摸索階段，但投資者仍可考慮趁近日一啲穩定嘅大型科技股，包括阿里巴巴(09988)及騰訊控股(00700)股價回落逐步吸納。
