【now.com財經】紫金礦業(02899)掟逾180億人仔入股赤峰黃金(06693)，交易完成後，紫金就會攞到赤峰嘅控制權，呢單大Deal成為昨日(23日)「大事件」之一，而紫金「囝囝」，明星半新股紫金黃金國際(02259)就接力成為另一個焦點，因為下星期一(30日)將會有1.74億股解禁股出籠。
紫金黃金國際喺去年9月底上市，股價今年1月曾衝破250元關口，但近期股價走勢比較差，若以昨日收市價計，已自1月高位268元回落咗超過30%，市場都關注「解禁」會唔會令股價進一步受壓。如果睇埋估值，以去年盈利計，依家紫金黃金國際市盈率(PE)逾23倍，貴過靈寶黃金(03330)及山東黃金(01787)。
港股經歷昨日「黑色星期一」後，雖然今朝有反彈，但彈力唔算強，進入「解禁」倒數階段嘅紫金黃金國際，股價今朝反覆向上，高開2.4%後，升幅一度擴大至4%，但之後曾短暫倒跌，最新報171.4元，升不足1%。
