【Now財經台】早前，山東黃金(01787)下調今年黃金產量至介乎36至38噸，較2025年減少逾20%，受消息拖累，集團股價應聲跌至逾2個月低位。公司指，因同業爆出安全事故，須按監管要求展開自我審查，因而影響產量。山東黃金下半年業績係咪都要打定輸數？董事長王成龍昨日(29日)建議，動用公司自有及自籌資金回購最多4億人仔A股，對股價有幾大幫助？
高歌證券金融首席分析師聶振邦估計，金價喺11月、12月下跌機會較大，所以未必係部署金礦股嘅好時機，加上山東黃金大幅下調產量，集團上半年盈利按年增長47%，但市場都預期下半年增長會放緩，除非有其他催化劑出現，否則，山東黃金股價短期都會跟金價走。
聶Sir又話，山東黃金對上一次回購股份係2020年，反映管理層傾向派息回饋股東，而非透過回購，佢相信今次回購目的係想改善股價表現，但喺減產及下半年業績被看淡下，估計回購對提振股價作用唔大。
