【Now財經台】截至早上11時止，過去1小時內《彭博》用戶搜尋量最多港股，依次為蒙牛乳業(02319)、普拉達(Prada)(01913)、騰訊控股(00700)、中國宏橋(01378)及比亞迪股份(01211)。
近期相對弱勢嘅科網股今日(6日)集體反彈，彈得最勁係昨日(5日)出咗業績嘅京東系，騰訊就要過多2星期先出業績，咩原因帶動大型科網股集體反彈？
大華繼顯執行董事梁偉源表示，恒生指數喺過去一段時間受科網股走弱影響，不過，今日有冚淡倉嘅買盤推高科網股，又認為今日係技術性反彈，未來一段時間中東局勢及油價走勢仍會主導全球市場。
Steven又話，市場普遍認為，騰訊業績唔會有太大驚喜，佢建議投資者留意業務指引，同埋騰訊可唔可以利用佢哋近期發展得幾好嘅人工智能(AI)新模型，喺應用層面受惠，令集團盈利前景更樂觀。佢建議投資者可以喺500元水平小注買貨，博業績有驚喜帶動股價再升。
