【Now財經台】騰訊控股(00700)旗下人工智能(AI)大模型「元寶」派成績表，日活躍用戶(DAU)突破5000萬，月用戶(MAU)更達1.14億，春節相關嘅抽獎次數逾36億次，不過，騰訊股價今日(20日)仍要受壓，跌至1個月低位，如果想博反彈可以點部署？
法興證券上市產品銷售部董事蔡秀虹指，騰訊股價過去兩星期向下，資金傾向趁低部署反彈，所以見到連續5個交易日好倉都錄得資金淨流入，牛證及CALL輪加埋有近1億元資金進場，依家較受歡迎係槓桿逾20倍嘅牛證，Eva提醒，由於呢啲產品非常貼價，距離現貨價僅約2%，喺正股波幅較大下，未必要揀咁高槓桿嘅產品，因為風險會更高。
佢建議，如果想部署牛證，可以揀距離現貨價6%至7%嘅產品，槓桿逾10倍，CALL輪亦有逾10倍槓桿嘅產品，今年6月至7月到期，價外少少，行使價700元樓上嘅CALL，今朝交投比較暢旺。
