【Now財經台】截至早上11時止，過去1小時內《彭博》用戶搜尋量最多港股，依次為泡泡瑪特(09992)、信達生物(01801)、智譜(02513)、比亞迪股份(01211)、美團(03690)。
泡泡瑪特創辦人王寧喺公司年會披露，去年賣出逾4億個IP產品，其中，Labubu去年賣咗過億隻，集團股價已連升7個交易日，由1月低位計，至今已反彈近100元，股價今日(10日)一度高見270元，再升近5%，雖然滙豐證券下調目標價至354元，但仍較現價有逾30%潛在上升空間，泡泡瑪特係咪仍可以繼續憧憬？
富途證券首席分析師譚智樂指，市場對泡泡瑪特未來增長預測非常敏感，之前股價由340元跌至170元，主因係炒價回落，但近期新嘅「星星人」系列等熱賣，炒價愈炒愈高，令市場情緒再次飄忽。Arnold認為，泡泡瑪特股價已經做咗一個明顯嘅技術調整，由於銷售數據幾靚仔，估計有機會挑戰前高位。
Arnold又建議，有貨嘅投資者可以繼續揸住，因為暫時未見到公司有競爭對手威脅到佢，但現時唔適宜估頂，想追入嘅投資者，由於股價近期升得比較急，加上炒價炒起已經係2至3星期前嘅事，所以睇下股價可唔可以觸及10天線再做部署，但睇基本因素，泡泡瑪特值得繼續睇好。
