【Now財經台】新能源車股今日(10日)表現唔錯，龍頭比亞迪股份(01211)表現亮眼，股價一度升4%，高見97.3元，股份跌穿90元關口後就出現反彈，係咪反映已見底？此外，比亞迪告特朗普(Donald Trump)政府，要求退還已繳付嘅關稅，呢個消息對股價有冇幫助？
元宇證券大中華區股票投資總監趙晞文指，相信比亞迪今次純粹係「跟隊」追返關稅，其他跨國車企喺北美地區嘅業務佔比大啲，索償嘅關稅會較多，但比亞迪「出海」戰略重心唔喺美國，就算成功入稟，最終攞得返嘅錢都未必好多，所以今次嘅行動更多係意識形態上嘅表態。
佢又話，比亞迪今年整體產銷量目標近600萬部，出口佔比有望提升至逾20%，由於集團主打東南亞及中東市場，美國關稅訴訟對佢刺激唔大，相信股價今日彈升可能只係一時炒作。
