【Now財經台】內地春節檔期就快到，多部賀歲片已經開始預售，據報預售票房已衝破2000萬人仔，業界估計，今年春節票房最高可以去到80億人仔，會唔會睇得太樂觀？如果真係咁好景，貓眼娛樂(01896)及大麥娛樂(01060)係咪可以炒返轉？
高歌證券金融首席分析師聶振邦表示，雖然市場普遍視內地春節長假期係利好因素，但亦要留意消費者可能趁長假外遊，反而分薄咗電影市場嘅客源，所以不宜對春節電影票房睇得太樂觀。
聶Sir又話，睇返電影內容，雖然今年賀歲檔期題材多元化，但唔係每一部都有好好嘅票房，以《飛馳人生3》為例，作為系列嘅續作，本身有一定口碑及票房打底，加上刺激、喜劇嘅定位，貼合春節喜慶嘅氣氛。不過，《驚蟄無聲》屬於國安題材，氣氛比較沉重，喺節慶期間受眾層面可能相對狹窄。
至於《標人》就改編自漫畫，雖然可以吸納特定嘅Fans，但漫畫改編嘅電影，評價一向都係好壞參半，票房會存在一定變數。
聶Sir又話，雖然喺股價操作層面睇，春節假期概念股往往可以帶動整體投資氣氛，大麥娛樂及貓眼娛樂可能短期有一定炒作空間，但未必有好強上升動力。佢提醒，呢類板塊風險較高，原因係唔知電影最終叫座力係點，加上製作成本高昂，就算票房好好，要回本仍然有變數。
