【Now財經台】截至早上11時止，1小時內《彭博》搜尋量最多港股，依次為快手(01024)、聯想集團(00992)、小米集團(01810)、騰訊控股(00700)及比亞迪股份(01211)。
快手股價連升3個交易日後，今日(7日)回套，一度挫近4%，低見72.5元，市傳集團擬破天荒發境外債。此外，內地市監局及網信辦規範及管理直播營運，規定唔可以畀熟客唔公平嘅交易收費條件，呢兩單消息對快手股價有咩影響？
資深證券分析師彭偉新指，發債係正面消息，雖然正股會產生攤薄效應，利淡股價，但利息扣稅可以降低整體成本，所以發債計劃未必係快手股價今日嘅跌因。
直播營運方面，Castor話，快手股價跌反映內地極度警惕「殺熟」行為，除咗快手，直播、直銷平台相關股份都一齊跌，不過，「殺熟」唔係第一次提出，所以只會造成短期影響，令股價有回調壓力，但唔係令股價走勢逆轉嘅主因。
