【now.com財經】雖然已經嚟到年尾，但本港新市場仍然熱鬧，除咗唔少趕「尾班車」掛牌外，已啟動IPO程序嘅公司消息亦不絕，最新就係內地「AI六小虎」其中兩隻「老虎仔」，已成功通過港交所(00388)上市聆訊，擬最快2026年1 月上市。
喺內地開發通用大模型嘅人工智能(AI)公司智譜華章，以及AI初創公司稀宇科技(MiniMax)上市聆訊已齊齊「過關」，其中，後者計劃根據《上市規則》第18C章喺主板上市，更有機會成為由成立到IPO歷時最短嘅AI企業，而騰訊控股(00700)及阿里巴巴(09988)都有投資稀宇。
