【Now財經台】華潤電力(00836)今日(21日)中午出咗業績，中期少賺近16%，又削派息逾20%，股價午後插水，一度急挫逾8%，險守18元。面對需求受壓，潤電要維持盈利仍要靠控制成本，雖然燃料價格跌咗唔少，但售電量仍未有起色，加上公司要發展新能源項目，令折舊及員工成本增加，點睇潤電前景？
耀才證券研究部總監植耀輝指，潤電轉向發展新能源，可降低燃料成本，而新能源相關裝機量佔比又會提升，所以市場最初都對集團業績有憧憬，認為新項目可以提振業績，可惜事與願違，潤電今次仲要削派息，可能會令市場預期公司業務前景轉弱，繼而影響集團投資價值。
