【Now財經台】近日華南地區受熱浪侵襲，由於市民紛紛開冷氣消暑，令用電量急升，火電股亦火熱，其中，華潤電力(00836)今日(29日)輕微低開後，好快發力向上，一度升逾5%，高見21.4元，成功扭轉橫行局勢。除咗天氣因素，上周山西發生17年以來最嚴重礦難，若導致煤炭供應緊張，繼而推高煤價，將令火電厰發電成本大增，到時或會加電費，利好火電股。
王道資本及家族資產管理執行董事黃敏碩指，其實早於3月底、4月初已見到電力股嘅上升勢頭，原因係市場見到電費市場化，雖然未至於「想加幾多 就加幾多」，但都見到當局態度軟化，令火電股擺脫浮浮沉沉嘅格局。
Michael又指，要留意原材料成本增加，會唔會拖低火電股毛利率，即使用電量大升亦會影響收入。此外，要留意相關企業有冇沾到人工智能(AI)概念，例如新能源業務發展涉獵較多，以及能否配合智慧算力中心發展等，都係推動估值嘅催化劑。
