【Now財經台】吉利汽車(00175)今日(14日)中午出咗上半年業績，收入按年增長27%，盈利按年跌14%，唔派中期息，吉利股價午後跌幅收窄，不過，若按半年計，盈利就大升增，去年下半年賺44億人仔，今年上半年就賺92億人仔，超預期，盈利主要集中喺第1季，因為有「以舊換新」補貼政策幫手，但第2季按季倒退，毛利率16.4%相對穩定，呢份業績收唔收貨？如果補貼政策延續，下半年汽車銷售係咪值得憧憬？
艾德金融執行董事陳政深指，吉利整體業績好壞參半，主要靠新能源汽車銷售帶動，但第2季盈利顯著下滑，反映行業價格競爭加劇，同埋補貼作用減弱。此外，集團負債增加，但保留咗較多現金，反映認為市場有較大不確定性，行業競爭仍然激烈，即使內地喺今年底汽車補貼完結後唔再延續，亦未必可以大幅刺激車企盈利，始終補貼政策只會喺初期有明顯效果，但亦要視乎市場需求及消費者嘅購買力，所以延續補貼嘅作用唔大，反而只會消耗國庫及資源。
