【Now財經台】美國科技巨企如微軟公司(Microsoft)及Palantir，均反映人工智能(AI)投資及應用效果、回報非常可觀，令唔少資金流入相關交易所買賣基金(ETF)，本港同樣有AI應用嘅科技股ETF，又值唔值得部署？
華夏基金香港高級經理李星宇指，美國同香港嘅AI投資概念有啲唔同，本港AI板塊主要同雲端服務公司有關，其次係AI應用公司，佢又指，AI發展第1步係大模型，之後係雲端，最後先至係平台股。
Chris又指，最近投資趨勢係偏向雲端服務企業，例如金山雲(03896)及阿里巴巴(09988)，不過，當AI發展成熟後，投資者就會開始追捧AI應用企業，例如騰訊控股(00700)同百度集團(09888)。此外，快手(01024)嘅AI應用都走得比較前，投資者下半年不妨繼續留意呢幾個板塊，但值得留意係，外賣平台股不時傳嚟「內捲」消息，呢方面或會令投資者比較擔心。
