【now.com財經】內地潮玩巨頭泡泡瑪特(POP MART)(09992)旗下皇牌IP(知識產權)Labubu嘅熱潮，近期被指明顯降溫，事實上，泡泡瑪特股價過去1個月持續喺250元至260元浮浮沉沉，不過，Labubu熱潮及泡泡瑪特股價近日可能出現一個「世界級救星」。
事緣近日國際級天后Lady Gaga喺美國LA被人野生捕獲時，發現佢隨身掛住1隻Labubu，仲由設計師Marko Monroe親自操刀，幫Labubu tailor made一個獨一無二嘅造型，將Lady Gaga巡唱嘅經典造型完美復刻，事件極速喺各社交媒體散播，網民再一次發揮創意，將呢隻Labubu命名為「Gabubu」。
「Gabubu效應」更直捲投資市場，股價近排冇乜睇頭嘅泡泡瑪特，股價昨日(4日)「咁啱」應聲炒高，收市升逾3%，收報251元，成交金額超過20億元，不過，股價今早(5日)就反覆向下，但暫時仍可企穩250元水平。
摩根士丹利最新出咗報告，指投資者只睇到Labubu熱潮漸退，但睇唔到POP MART新IP產品其實經常斷貨，又話呢個情況反映唔係需求疲弱，而係供給瓶頸凸顯嘅價值體現。
睇下喺大行不離不棄，以及呢波「Gabubu效應」下，可唔可幫泡泡瑪特股價及Labubu銷售打破悶局。
