【Now財經台】協鑫科技(03800)公布跟中國太保投管研發真實世界資產(RWA)代幣化，將現實世界資產轉為區塊鏈中嘅加密貨幣，推動採納合規數字資產產品及服務，包括穩定幣應用開發及去中心化金融整合等，消息刺激協鑫科技股價今朝(18日)一度飆14.5%，高見1.42元，但其後倒跌，通告提及嘅資產化，包括但唔限於具低碳屬性嘅「夥粒硅產品」，以市場定價機制與穩定幣進行交易，到底需求有幾大？
紅蟻資本投資總監李澤銘指，早期的確有需求，市場對其仍然有新鮮感，加上同加密貨幣(Cryptocurrency)有關，似乎炒得起，不過，如果資產本身唔夠吸引，長遠都好難Keep到需求，加上唔係所有現實世界嘅資產都可以代幣化，現階段較易代幣化，一般都係環保、新能源等，呢類較易監察及數據透明嘅相關資產。
股價方面，協鑫科技之前已經升咗唔少，而今次只係簽MOU(諒解備忘錄)，意味可能會有變數，去年業績又轉蝕，公司負債又重，Alan就話，呢隻股份之前蟹貨都比較多，唔少投資都趁今朝大升離場。佢又指，光伏係「內捲」最嚴重行業，雖然中央出手「反內捲」，但長期供求係咪可以解決到，呢個係一個好大不確定性，又認為協鑫科技未必有長期上升動力。
