【Now財經台】摩根大通昨日(15日)發報告唱好協鑫科技(03800)，指集團獨有嘅FBR生產技術，可以令公司成為全球成本最低嘅多晶硅生產商，長遠會因生產效率大升令碳足跡遠低於同業，而受惠於碳交易，未來可以獲得更高生產配額，進一步提升市佔率，公司嘅成本優勢係咪可以維持？集團有冇機會扭虧？
信達國際研究部董事趙晞文指，理論上協鑫科技可以keep到成本優勢，但關鍵係整體光伏產業鏈嘅下游需求未來會唔會回升，「反內捲」可唔可提升行業盈利能力。近年由於供過於求，光伏行業嘅產業鏈價格面對好大壓力，未來留意政策可唔可平衡返供求，同埋單位成本可唔可以因行業復甦而下降。
他續指，隨著協鑫科技自身業務規模效應逐步提升，加上新業務嘅潛在貢獻，集團盈利能力復甦指日可待，但到底幾時可以扭虧，仍要睇下游嘅中端需求幾時出現明顯復甦。
